مش كل الحالات بتيجي بشكل واضح أو “كلاسيك”… وفيه حالات ممكن تضلّلنا لحد آخر لحظ
...................................................................
شاب في منتصف التلاتينات جه يعاني من دوخة شديدة وقرب إغماء على فترات متكررة…
ومفيش قيء دم واضح، ولا براز أسود صريح… لكن كان فيه حاجة مهمة:
الهيموجلوبين (نسبة الدم) كان بينزل كل مرة بشكل ملحوظ.
بدأنا نتعامل مع الحالة على إنها نزيف من الجهاز الهضمي مش واضح المصدر، واشتغلنا على: تعويض سوائل + نقل دم…
المريض يتحسن شوية، وبعدها يرجع يتعب تاني من غير سبب واضح.
أول منظار عملناه ما كانش مفسّر للحالة…
كان فيه تغيّرات بسيطة في بطانة المعدة، لكن مفيش حاجة تفسّر كمية النزيف دي.
هنا بدأ الشك: “أكيد في حاجة مستخبية”.
قررنا نعيد المنظار بدقة أعلى وبتركيز أكبر على منطقة معينة…
وهنا كانت المفاجأة:
نقطة صغيرة جدًا عند بداية المعدة من ناحية المريء (عند الـ GEJ)… شكلها بسيط جدًا، وممكن تتفوت بسهولة.
لكن لما ركزنا كويس، لقينا نقطة فيها جرح صغير ومعاه وعاء دموي مكشوف بينزف.
المشكلة دي مش قرحة عادية، ومش دوالي.
دي حالة اسمها “Dieulafoy lesion”
وهي سبب نادر لكنه مهم جدًا لنزيف ممكن يكون خطير رغم إن شكله صغير جدًا ومخادع.
تم التعامل مع النزيف بالمنظار (حقن + كليب)،
والحمد لله النزيف وقف تمامًا واستقرت حالة المريض
